• Yop Poll Archive
  • Archives
  • Categories
  • Archive for abendua, 2007

    trena


    2007 - 12.30

    Maleta, maletina eta txamarra lodia. Jarlekuan eseri, egin beharreko bideari atzea emanda, heldu beharreko lekura heldu nahiko ez banu bezala. Parean eserlekua. Urruti. Hankak ezin bertan jarri. Ni atzeraka, aurrekoak aurreraka. Lau gizonezko eta hiru emakumezko. Zein baino zein bereziago.

    Urrutien erdi-lo, aurpegia eskuez eztaltzen duen atzerritarra. Aldamenean, lurrera begira doan eta, itxuraz, irratia entzuten doan gizon edadetu bat. Honen aurrean belarrietatik zintzilik mp4-a duen eta musika 1000Hz-tan jarrita duen gaztea. Ondoan, emakumezko edadetu bat. Andere txukuna, atsegin itxurakoa. Honen aurrean, beste bi emakume, elkarrekin hizketan. Zeri buruzkoa ote beren jarduna?

    Azkenik, bagoian ikus nezakeen pertsonaiarik bereziena. 35 urte aspalditxo betetako gizona. Bere janzkera eta itxura bereziak deitu du nire arreta. Bakero batzuk. Estu-estuak. Marroi koloreko alkondara bat eta gainetik, txaleko beltza. Fina, dizdiraduna eta atzean begizta eta guztikoa. Jaitsi behar ginen geltokira iritsi aurretik, narru beltzezko jaka jantzi, poltsikoan eskua sartu, zilar koloreko zerbait atera eta ahora eraman du. Toxatik trago eder bat emanda, prest treneko triki-traka epela utzi eta kanpoko freskotasunari aurre egiteko.




    Bizitza bera da trena… bere triki eta traka eta guzti…


    Pertsonaia batzuk trenetik irten, beste batzuek aurrera jarraitu, berriak sartu…


    Eurak nire bizitzako momentu labur bateko pertsonaia…


    Eta ni beraiena???

    Trena galdu dut


    2007 - 12.22

    Klasetik ohi baino goizago irten naiz. Egoitzara bidean, kakalardo gorri disdiratsu baten barruan amona bat ikusi dut poliki-poliki gidatzen eta barrea eragin dit. Poza etorri zait ezpainetara nahiz eta zu 60 kilometrora egon eta berriz noiz ikusiko zaitudan jakin ez… Zure irudia etorri zait burura segituan…

    Egoitza ondoko dendara sartu eta goxokiak erosi ditut. Berriz elkar ikusten dugunean emateko asmoz, usteltzen ez badira bederen…

    Bazkaldu ondoren, maleta egin eta autobusa hartu. Bakarrik. Zure konpainiarik gabe. Zure eskua hartu gabe hartu nau loak…

    Autobusetik jaitsi eta zu ikusteko esperantza txiki bat izan dut. Berehala joan zait. Aurrera jarraitu dut eta zure etxe aldera begiratu dut… Hantxe zeunden! Nire irudimena ez zebilen nirekin jolasean! Zu, hezur eta haragiz… Zu! Eta goxokiak uste baino lehenago eman ahal izan dizkizut… Elkarrekin egongo ez garen egunetan nitaz gogoratzeko…

    Gogo handirik gabe esan dizut agur eta trenera joan naiz. Tren geltokira heldu, trena ikusi eta trenak alde egin dit…

    trena

    Nire subkontzienteak trena galtzea nahi zuen ordubete goxo-goxo zurekin pasa ahal izateko…


    Tresna-barrara saltatu